it's time to get above ourselves

The Tales we Tell Oorsells

This is the first in a multi-pairt series examinin whit stories we as Scots are tellin oorsels the day through oor institutions an publications.

We begin wi ane o the maist sexy an excitin o aa Scotland’s historical eras, an potentially the ane wi greatest relevance tae the political an cultural clash o the day; the era o the Jacobites.

The Jacobites are the subject o a “major new exhibition” at National Museums Scotland. Afore we howk through the exhibition itsel, lets mind oorsels o the Jacobite movement. Jacobitism is kent by sic a title fir its patron King Jamie, the coupit king o Scotland an England, the victim o a parliamentary conspiracy an coup organised by Westminster.

Owre the furst 20 an mair years o this new regime, resistance wasnae hard tae thole fir the croon. Fowk wernae owre fond o King Jamie. Bonnie Dundee, John Claverhouse led a wee risin o Hielan men in 1689 efter raisin the King’s stannart at the tap o Dundee Law, but pairtly due tae the unpopularity o that mannie, the risin neer took aff, an it deid a deeth when Claverhouse himsel deed at Killiecrankie. There wis a stooshie at an Irish burn caaed the Boyne, but it came tae nocht.

Houaniver, anither event in the furst years o the new century wid fair shoogle Scottish society, an gar the ordinary fowk poor oot their hooses an tak airms in rebellion: The Acts o Union wi England.

Scotland turnt itsel tapsalteerie wi anger, the ordinary fowk raged agin this Union. Thon’s weel documentit an we needna rak owre auld coals here. Riots broke oot in Embra, Glasgae, aawye. Mass resentment wis felt keenly through ilka layer o Scots society, fae cobbler an fermer tae peasent an priest. The reason this widespreid violence didnae kick oan intae a full-bluidit rebellion is this; we didnae hae ae figure nor movement tae rally roon.

Jacobitism saw its chance. The son coupit King Jamie, King James VIII, hud been bidin in France, haudin aff on invasion till they saw a hopfu moment. He an his follaers ettled tae capture the zeitgeist o anti-union dissaffection. They selt theirsels tae the Scots as the ainly gait tae ging doon tae reclaim independence fae England. Ilka message back tae Scotland fae the exiled coort in France argued “gie us a haun tae unseat the usurpers o the throne an we’ll mak Scotland free an prosperous again. A soveriegn parliament, a braw trade deal wi the colonies, preferential treatment. A Scots dowp oan a Scots throne aince mair.”

This message activatit the population o Scotland. In 1715, the biggest o aa the Jacobite risins took place. Some historians reckon mair nor 50% o ilka man, woman an bairn in Scotland, fae Stornoway tae Lerwick tae Hawick, wis insnarlt wi the rebellion, either as sodger o supplier or camp-follaer. Scotland hud neer been in sic complete uproar.

This multi-cultural Jacobite force whummelt the British at Sherramuir, but the owre-muckle, unweildy airmy o unpeyed fermers soon wearied o hingin aboot waitin fir action, an daundered aff hame tae see tae the hairst.

The mair famous risin in 1745 wi Bonnie Prince Charlie at its heid wis unco smaa comparitively. Less than ten thoosan fowk were oot wi him. Yet this smaa airmy still gaithert itsel thegither fae across the hail nation an succesfully invaded as far sooth as Derby, ainly a hunner miles fae London.

This isnae the tale telt by National Museums Scotland (NMS). They yaise the auld-farrant history fae the tap-doon approach. Their tale is aa aboot the high heid yins, wi nary a
thocht fir the tide o humaity that cairted them aroon.

Ye walk in tae the exhibition space and richt fae the stert ye ken the score; there’s a muckle romantic portrait o “Bonnie Prince Chairlie”, pentit in 1892, a hunner year an mair efter his deeth. The soontrack pleyin through the speakers owreheid? The Skye Boat Sang. A mair insipid sang its gey hard tae imagine. Screivit in the eighteen hunners by an English baronet, it has naethin tae dae wi Scotland, nor wi Jacobitism. Insteid, like pentin, it’s a privileged, romantic view o Jacobitism.

This furst impression is worth dwellin a bitty langer oan. Tae wale this sang fae oot the lave o Jacobite balladry, the NMS hud tae owrelook ane o the richest kists o folk music an sang onywhaur in Europe. Jacobites were no ainly commemorated in sang efter their efforts, but they themselves screivit sangs as recruitment agents an merchin anthems. The Brits fir their pairt pit sangs thegither anaa. Ilk ane o them wouldae been mair worthy than the anodine pish they waled.

But the NMS didnae yaise Johnnie Cope, screivit in the Lothians efter the battle o Prestonpans, nor Killiecrankie, screivit by Rabbie Burns an expanded by James Hogg, nor ony ither o the wheen o braw Scottish sangs in Scots an Gaelic that wid tell us anent the Jacobites fae oor ain perspective.

They yaised a sang screivit in braid English, by a cheil wha hud naethin ataa tae dae wi Jacobitism nor Scotland. This sets the alienatit, Anglicised tone fir the exhibition.

Front an centre o ilka chaumer’s exhibits are aye the concerns an interests o the rulin elite. They are; legitimacy o succession, material wealth an personal comportement. As ye ging through the chaumers ye finn weel-wrocht artistically presentit faimly-trees. The NMS ettles tae explain that Bonnie Prince Chairlie is actually kythed fae the same ancestry
as oor incumbent monarch, an that like the mony serpent-heids o Medussa, aa these rulers grow fae the same source.

This bourgeois worship o the deid in ae chaumer is follaed by a bourgeois worship o material culture in the neist. Ae hail chaumer is dedicatit tae the wappins o the Jacobite sodgers. There’s a seriously bonnie blunderbus burnished tae a high gleam. There’s quaichs linkit by legend tae the Bonnie Prince, an ane o the dandiest tartan ootfits ye’ll eer clap een on. These bonnie artefacts are presented as bluidless objects d’art, an no the wappins o wir recent relations wha, presumably, deed at British hauns at Culloden fechtin fir Scotland’s independence. Ae Scot does manage to mak his wirds heard but: a Claymore hings in a case, its hilt is inscreivit wi the wirds “Prosperty tae Scotland an nae union”. The weeest glisk intae the thochts o the fechtin men.

Ye’re nae mair nor haufwye roon the exhbition afore a few tthochts stert loupin up at ye.

Whaur are the Women? Literally the ainly lassies in the exhibition up tae that pynt hud been mentioned due tae the bairns they’d kythed or wha they’d marriet. Women are presentit as haein nae agency at aa in the movement. This auld-farrant view wis couped ontae the midden o faus history some years syne by the crackin book Damn Rebel Bitches: The Women of the ‘45 by historian Maggie Craig. As Maggie hersel says “Women gave money and hospitality, acted as spies and raised men for the Jacobite Army. They tended
the wounded and hid fugitives from the Redcoats.”

This exclusion is damagin tae the nesit generation o Scottish females. The exhibition wis hoachin wi young lassies wi their faimlies. They wilnae hae seen onythin tae suggets that they theirsels could dae somethin worthy o the history books. History à la NMS is still HIS-story, a masculine narrative.

Whaur are the gaels? This maun be a central question when assessin the effectivenss o the exhibition at tellin us wir ain tales. The 1745 risin wis stertit oot in the western islands. Prince Chairlie cam owre fae France wi gey few provisions an essentially nae men nor gowd at aa. He hud tae strike like a bolt o fireflaucht intae the thrang o gaelic lairds, an stir a rebellion intae bein. Whit did he dae tae get them oan side? Whit arguments were pit afore the crofters an tacksmen, whit cultural pressure wis brocht tae bear? Hou wis this intrusion unnerstood by the guid fowk o the western isles that were awa tae gie thoosans o their best brawest laddies tae the cause?

In a wee “minorities neuk”, a dark chaumer, a sad film pleys an a gaelic wifie sings a doolsome sang. A wee laminate gies an owresettin o the Gaelic, an lets ye ken that the wifie singin is that scunnert acause o the men the war’s tane fae her.

Gaelic history is aye gien in the same wye: loss, heartache, deeth.

Whaur are the teuchters? It wis yir east coast toons, likes o Brechin, Huntly, Forres, that pit forth thoosans o men tae fecht, wha produced innumerable sangs an poems, tunes an laments in a great ootpourin o culture, wha experienced their finest moment in thae years o Jacobitism. These same airts sairly lack a strang identity the day. A national exhibition that gied them their deserved credit could’ve been a shot in the airm fir their confidence.

Whaur are the Gaelic an Scots leids? As ye’d expect fae an institution that doensae spikk either leid, they arnae there in ony meaningfu sense. This exclusion robs the day’s spikkers o a connection wi the history o their tongue an culture.

It isnae hard tae see the subtext. The narrative o the gaeltacht as telt by the official historians, NMS includit, is ane o failure an obsolescence. The narrative o women is a life o tholin hardship. As fir the teuchters, they micht as weel no exist. Whaur the fuck even is Huntly?

When ye reach the final chaumer the reason fir aa this distortit narrative is revealed. There’s anither set o displays stappit fu wi siller this an burnished that. Set ahint them is a weel-
lichtit portrait o Her Majesty Queen Elizabeth I/II.

Ablow this is a wee caption: “lent to the NMS by Her Majesty the Queen”. A quick keek at a puckle ither displays, an ye see that in fact the croon hae gied a fair wheen o the artefacts oan display tae the NMS.

This is a conflict o interest in the maist compromisin wye. Ye cannae tell the tale o a risin, wha’s twin aims were the topplin o the union an the removal o its illigitimate usurpin monarchy, yaisin artefacts lent tae ye by the victors o that conflict.

There are some successes here: the displays o material culture are captivatin tae bairns an adults alike, an licht in fowk an interest in the Jacobites that itherwise micht hae neer been lichtit. The displays are weel-wrocht an o international quality. That lets fowk ken that the Jacobites are at least worth takkin tent o, an that Scotland has a history worth investigation. This airticle an mony ither debates wouldnae hae been provoked wioot the NMS ettlin tae tell the tale at aa.

But fundamentally, the exhibition is a failure.

Jacobitism maun be a tale o Scotland’s potential, o the might o oor communities an the strength o oor culture. Nae just anither opportunity fir the rulin class tae let us ken wha’s really in chairge.

 

*

We really need your support to develop and we’d like to ask you to support us by donating to us here.

We’ve got big plans to launch our new site, to launch new publishing and events projects, and to extend our platform of writers – but all of this needs your support.

Bella Caledonia remains free (and ad-free) and takes me hundreds of hours a month to research, write, commission and edit. If you value what I do, please consider supporting with a recurring monthly donation of your choosing. GoCardless to set up a small monthly donation to support independent journalism in Scotland.

Thanks!

*
Go here to subscribe for free and get each Bella article sent to your email
Go here to follow us on Twitter @bellacaledonia
Go here to follow us on Instagram
Go here to join our Facebook Group
Go here to follow us on Spotify
Go here to write for us

Subscribe Support Scots & Gaelic Content

Related Articles

See all related articles >

9 Comments

  • Wullie 3 months ago

    Visited the exhibition today, found it very interesting, it’s basically about the later Stuarts & their kit n caboodle. Puir folks hadn’t much in the wey o gear tae display! In response to criticism? they have Kathleen MacInnes singing in Gaelic on a loop.

    Reply
    • Ally 3 months ago

      Ye’re nae wrang, Wullie. The puir fowk that focht alangside Chairlie wouldnae hae had owre muckle tae leave tae posterity in terms o gear.

      But they left us ane o the richest cultural treasures in Europe in terms o the kist o balladry an music the Jacobites baith screivit an invoked. Thon wouldve been a gey easy wye tae link us tae the past, an gie fair representation tae the fowk involved.

      Reply
  • Alf Baird 3 months ago

    Anither braw airticle Ally. Thon NMS, lyke maist ‘Scottish’ public quango’s, haes maistly English an Anglicised heid bummers, sae thay dinna ken muckle aboot oor weys, oor cultur, oor langage etc.

    Thay teuk awa thon twa braw beglamour pownds juist sae thay coud hae fantoush denners fir fowk likent wi thaimsels, thon maistly ‘unionist’ legal/financial/rugby set. Oor colonial maisters are juist unkennin an no interestit in oor cultur, oor fowk, or Scotlan.

    Reply
    • Ally 3 months ago

      Cheers Alf, appreciate it

      Cannae agree wi yir constant war agin the bonnie sport o rugby, tho whiles the high heid yins mak theirsels intae cultural retroactive forces.

      Reply
  • Alistair Livingston 3 months ago

    Unfortunately this article blanks out the south west of Scotland. The experiences of people in Ayrshire, Lanarkshire, Dumfriesshire and Galloway 1660 to 1688 when they were treated as traitorous Whig rebels by Charles II government created a hostility to the Stuarts which was long lasting. On 1715, a few landowners -Gordon of Kenmure, the earl of Nithsdale, Basil Hamilton of Baldoon, the Maxwells of Munches and Robert Grierson of Lag’s two sons- declared for James VIII and III.

    They were opposed by a ‘citizens militia’ which supplied Dumfries with about 2000 volunteers when the local Jacobites plus some from the north of England and about 2000 Highland Jacobites attempted to capture Dumfries in October 1715. The Jacobites advanced towards Dumfries twice but withdrew both times rather than attempt to capture it. The Jacobites had no wish to repeat their failure at Dunkeld in 1689 when they were defeated by armed Covenanters.

    The memory of 1715 was still strong in 1724, when the Galloway Levellers accused Basil Hamilton and other landowners of being part of a Jacobite conspiracy to clear loyal supporters of King George off the land.

    Reply
    • Ally 3 months ago

      That’s a fact, Alistair
      (guid tae see anither correct spellin o that fine nemme an aa 😉

      Ah dae ignore the SW in this airticle. Ah hud anither feev hunner wirds screivit that went intae the hail Glasgae rejection o Chairlie etc. But Ah hud tae bung it ontae the muckle midden o cut content. It wis owre detailed an mibbie borin fir yir average reader.

      Ah’m glad ye raised the issue like, lets fowk scrollin doon ken that there is indeed a gey interestin an unique SW experience o Jacobitism.

      Dae ye feel that that gies the airt a sense o seperation fae the sangs an tartan etc celebrated elsewhere in scotland?

      Reply
  • Billie the Prod 3 months ago

    A’m shuir a Papist monarch wad hae been weel acceptit in a keenly Protestant Scotland.

    Reply
  • Ian McEwan 3 months ago

    Great article. The question “whaur the fuck even is Huntly?” was beautiful in humour and scathing sarcasm. Plan to see this thing and will be interested in what it offers!

    Reply
  • Ian McEwan 3 months ago

    The question “whaur the fuck even is Huntly?” will live long in the memory. Thank you for a great article.

    Reply

Leave a Reply to Alistair Livingston Cancel reply

Your email address will not be published. Required fields are marked *

Other articles in Scots

See all in Scots >